لو انا شغال مصر 3 YOE في مجال التيك وعايز اسافر اوروبا او اي حاجة بره مصر مثلا المانيا ممكن تلخص الحوار في كذا خطوة لو مش هطول عليك؟
السفر لألمانيا فى مجال التيك قدامك اكتر من طريق على حسب خبرتك و ظروفك تختار المناسب معاك بس خلينا نلخص الدنيا : 1- ده الحل الافضل انك تدور على الشركات فى ألمانيا و تقدم على الوظايف و تعمل انترفيوهات و تتقبل و تيجى على عقد عمل لأن ده مش هيكلفك غير وقتك فى الانترفيوهات و بس و ساعتها هتيجى و تشتغل و تبتدى هنا و تقبض مرتب من اول شهر شغل ليك. ٢- فيزا دراسة ماستر او انك تيجى فيزا كارت الفرص هتحتاج حساب بنكى مغلق بحوالى ١٣ الف يورو و تيجى هنا تصرف من فلوسك الشخصية ايجار و مصاريف لحد ما تعمل انترفيوهات و تتقبل و طبعا هيبقى عليك ضغط الوقت مع الفيزا وانك محتاج شغل فى مجالك لأن المتاح هيبقى شغل الطلبة اللى ممكن يساعد فى المصاريف بس مش هيبقى عندك وقت كبير تذاكر و تحضر للانترفيوهات فماحدش فينا بيرشحها بالذات كارت الفرص إلا لو انت عندك خبرة كبيرة و مهاراتك ممتازة فاضل بس تلاقى فرصة و مش هتاخد وقت كبير زى واحد سنين خبرته مش كبيرة .. عشان للأسف ناس أصدقاء لينا خلصوا مدة فيزا كارت الفرص و اضطروا يرجعوا مصر عشان مالاقوش فرصة و كانوا بيصرفوا من فلوسهم و هما عندهم مسئوليات عشان كده فيزا كارت الفرص دى فخ نصيحتى من دلوقت اشتغل على انك تاخد خبرة كبيرة فى مصر وتتعلم ألمانى من دلوقت ده هيزود من فرصك أكتر و برضه نصيحتى ليك ماتحكمش على نفسك او تحس انك مقصر لو انت بتقدم و ماحدش بيرد الوضع فى المجال مجنون بقاله فترة فى ألمانيا و كمان فى مصر فالمشكلة مش هتبقى فيك على قد ما الدنيا مجنونة حاليا و ماحدش عارف يتحرك من شركته بسبب الجنون ده ربنا يوفقك و تنور ألمانيا قريب بإذن الله
متشكر علي ردك بس جزئية اني أدور علي شغل في المانيا ازاي يعني اعمل الresume بتاعي بالانجليش ولا بالالماني وهل هما اصلا هيبصوا علي الresume بتاعي وانا مصري؟
تقدر تعمله بالانجليزى او الألمانى عادى بس يفضل ألمانى .. ادخل على Linkedin و دو رعلى الوظيفة بتاعتك و حدد الدولة اللى بتدور فيها تكون ألمانيا هيظهر لك الوظايف المتاحة ابعت و قدم عليهم كلهم و فيه شركات بتعمل relocation و شركات لأ فهيجيلك الرد عادى و واحدة واحدة هتدخل انترفيوهات و تعرف الناس بيهتموا بإيخه و بيحتاجوا ايه و تزود خبرتك فى الاجزاء اللى هتكون ناقصاك .. برضه تقدر تضيف الـ HR بتوع شركات بره اللى بينزلوا اعلانات للشغل فى شركتهم و اهتم انك كل شوية تعرض شغلك او الشهادات اللى بتاخدها او الكورسات اللى بتخلصها بحيث ان البروفايل بتاعك يكون متشاف و واحدة واحدة هتلاقى حد دخل يكلمك على وظيفة عندهم زى ما حصل معايا فيه برضه ويب سايت زى لينكدان اسمه Xing ده للسوق الاوروبى تقدر تقدم على الوظايف عليه هناك و اه عادى انت مصرى او انت عايش فى مصر هيبصوا على خبراتك و مهاراتك عادى جدا لو شافوك مناسب للوظيفة هتتعين عادى ولو هما بيدعموا الـ Relocation او لأ هيقولولك و هتعرف من ردهم لو مش هيقدروا يستنوا على شخص يخلص اجراءات الفيزا و كل الكلام ده فقدم عادى .. عشان كده قولتلك سنين خبرتك و مهاراتك مهمين و ده اللى هيخليهم يستنوا عادى جدا عكس لما تكون خبرتك مش كبيرة فموجود كتير زيك عايشين فى الدولة و معاهم اقامة وتصريح عمل و جاهزين يشتغلوا ز انا مصرى و عايش فى مصر و الـ HR هى اللى دخلت كلمتنى على الوظيفة على لينكدان لما شافت البروفايل بتاعى و بعت السى فى و كان بالانجليزى بس كمان وابتديت معاهم الانترفيوهات و بعتولى الاوفر و الورق اللى أقدمه فى السفارة و قدمت والحمد لله الدنيا مشيت فاعمل كل اللى عليك و ان شاء الله ربنا يوفقك